ليه توقيت إعلانك هو مفتاح كنزك الرقمي؟ (دليل المعلمات والأكاديميات أون لاين)
تخيلي معاي المشهد ده: أنفقتِ آلاف الجنيهات على إعلان مبهر، صورته أحلى حاجة، والكلمة بتاعته بتشد، استنيتي السيل يهل.. بس حصل إيه؟ مافيش تفاعل مافيش رسايل!
الإعلان طار بفلوسك في الهوا، وطلعلك صفر على الشمال!
.jpeg)
متزعليش.. مشكلة إعلانك مش في جودته، ولا الشخص المعلن المشكلة إنك نزلتيه في "الموت".. آه والله في الموت! في التسويق، في حاجة اسمها "السيزون" أو الموسم، زي ما للفاكهة موسم، للتعليم كمان مواسم.
تعالي أقولك إمتى تزرعي عشان تحصدي.
"توقيت الإعلانات" مش مجرد حظ، هو علم وفن وذكاء.
إحنا دلوقتي في شهر مبارك، شهر القرآن. و الناس فيه مشغولة بالعبادة، والعزومات.
طيب إحنا كمعلمات، نعلن إعلاناتنا التعليمية دلوقتي ولا نستنى؟
تعالي نفكك الموضوع:
1. لو شغلك على "القرآن والدورات الإيمانية":
رمضان ده موسمك الذهبي الصريح! الناس قلوبها حاضرة وبتدور على كل حاجة تقربها لربنا.
لو بتقدمي حلقات تجويد، تفسير، أو دورات تدبر، فأرضك دلوقتي مُخَصَّبة. استغلي السيزون، أنزلي بإعلاناتك ودعواتك مقبولة.
2. لو شغلك على "المناهج الدراسية والتأسيس":
الموضوع هنا مختلف شوية.
· الدراسة لسه واقفة؟ يبقى الأفضل تريحي دماغك وتستعدي..أنفاس الناس في رمضان مش مع المناهج.
· إنتي مستهدفة دولة معينة؟ مثلا دول الخليج إجازتهم امتى. لازم تكوني عارفة مواعيد الترم بالظبط، ومواعيد الإجازات. مش كل الدول زي بعضها!
الحل السحري: مراجعات ما قبل الامتحان حتى لو رمضان، لو عارفة إن في ناس امتحاناتهم بعد العيد بأسبوعين، تقدري تعملي "كمبين" تسويقي ذكي.. إعلاناتك تركز على "المراجعة النهائية" و "لايف ليلة الامتحان". بتكون مطلوبة بشدة.
طيب إيه هو التوقيت المثالي؟
عموماً، لو بتقدمي مناهج دراسية، الفترة الأكثر سخونة هي بعد العيد مباشرة.
الناس بتصحى من غفوة الإجازة وتفزع للدروس الخصوصية والكورسات.
ده موسم الحصاد الحقيقي. ماتصرفش فلوسك دلوقتي على إعلانات هتتوه في زحمةالعزومات. استثمرها صح بعد العيد وهتشوفي الفرق.
الخلاصة:
يا سادة يا كرام، التوقيت هو الروح في جسد التسويق.
قبل ما تضغطي على "زر الإعلان"، اسألي نفسك: جمهوري مستعد يسمع مني دلوقتي؟
خططي بذكاء، واستعدي من دلوقتي، وانطلقي في الوقت الصح.
وخليكي فاكرة، الفلوس اللي هتوفرها من إعلانات رمضان، هتكون رأس مال إعلاناتك اللي هتحققلك أرباح خيالية بعد العيد.
إيه رأيكم؟ نزلتي إعلانات في رمضان السنة اللي فاتت؟ شاركينا تجربتك في التعليقات عشان الكل يستفيد.
Comments
Post a Comment